Ǵylym ordasynda Abaı Qunanbaıulynyń 180 jyldyq mereıtoıyna oraı «Abaı mektebi jáne ult zııalylary» taqyrybynda halyqaralyq tanymdyq is-shara ótti, dep jazady Egemen.kz aqparat agenttigi.
Atalǵan sharany «Ǵylym ordasy» RMK Qazaqstan ǵylymynyń tarıhy mýzeıi men ál-Farabı atyndaǵy Qazaq ulttyq ýnıversıteti janyndaǵy «Turan-Iran» ǵylymı-zertteý ortalyǵy birlesip uıymdastyrdy.
Sharaǵa «Ǵylym ordasy» RMK bas dırektory Ular Muqajanov, Prezıdent janyndaǵy Ulttyq ǵylym akademııasynyń vıse-prezıdenti, akademık Asqar Jumadildaev, «Turan-Iran» ǵylymı-zertteý ortalyǵynyń dırektory, professor Islam Jemeneı, M.O.Áýezov atyndaǵy Ádebıet jáne óner ınstıýtynyń bas dırektory Kenjehan Matyjanov, Iran Islam Respýblıkasynyń Almaty qalasyndaǵy Bas konsýldyǵy janyndaǵy Mádenı ókildiktiń dırektory Hosseın Aǵazade, sondaı-aq ǵylym men mádenıet salasynyń tanymal tulǵalary, sheteldik elshilikterdiń ókilderi, jas ǵalymdar men zertteýshiler qatysty.
Is-sharanyń basty maqsaty – Abaı Qunanbaıulynyń rýhanı murasy men shyǵarmashylyǵyn ulyqtap, ony shyǵys mádenıetimen baılanystyra zerdeleý arqyly ulttyq rýhanııatty, ǵylym men bilimdi keńinen nasıhattaý.
Jıyn barysynda «Ǵylym ordasy» RMK bas dırektory Ular Muqajanov «Abaı – bizdiń ulttyq oılaý júıemizdiń, rýhanı-mádenı bolmysymyzdyń negizin qalaýshy. Búgingi ǵylymı jıynda Abaı murasyn tek ádebı turǵyda emes, órkenıettik, tarıhı-fılosofııalyq turǵyda qaıta qarap, onyń Shyǵys mádenıetimen baılanysyn ashý – óte ózekti ári qundy qadam. Bul – jastar úshin de, ǵylymı qaýym úshin de úlken taǵylym mektebi», dep atap ótti.
Is-shara aıasynda professor Islam Jemeneıdiń birqatar ǵylymı eńbekteriniń tusaýkeseri ótti. Atap aıtqanda, parsy tilinde jazylǵan qazaq tarıhy, ádebıeti, mádenıeti men tiline arnalǵan zertteýleri, qazaq tilindegi «Abaı jáne Shyǵys» monografııasy, sondaı-aq ózbek tilinde jaryq kórgen «Ámir Temirdiń saıası qyzmeti men joryqtary» eńbegi kópshilikke tanystyryldy.
Mádenıet pen bilim salasynyń ókilderi, ǵalymdar men zertteýshiler Abaı murasynyń ǵylymı, rýhanı jáne mádenı mańyzy, sondaı-aq professor Islam Jemeneı eńbekteriniń ózektiligi týraly mazmundy baıandamalar jasap, pikir almasty. Baıandamalarda Abaıdyń shyǵarmashylyq murasy men dúnıetanymy Shyǵys órkenıetimen sabaqtastyryla zerdelenip, onyń rýhanı tereńdigi ǵylymı negizde taldandy.
Ǵylym men rýhanııat toǵysqan taǵylymdy basqosý Abaı dúnıetanymyn qazirgi zamanmen sabaqtastyryp, Shyǵys pen qazaq órkenıetteriniń tarıhı-mádenı úndestigin jańasha paıymdaýǵa jol ashqan, mańyzy zor ǵylymı alańǵa aınaldy.
ALMATY